Октябрь ойининг биринчи ярмида вилоят ҳокимининг рақамлаштириш бўйича маслаҳатчиси Бахтиёр Ахунбабаев Рақамли технологиялар вазирлиги ҳудудий шўъбаси раҳбари Расулжон Холматов, IT-Park вилоят филиали масъуллари билан 20 дан ортиқ АйТи компаниялар, IT-Park резидентлари ва 50 дан зиёд фрилансерлар билан учрашувлар ўтказди.
Учрашувлар ҳар бир субъектининг фаолият манзилида ташкил этилди. Иш фаолиятини янада ривожлантириш, мавжуд муаммолар ечими бўйича амалий ёрдамлар кўрсатилди.
Наманган шаҳрида фаолият кўрсатаётган «Алгоритм», «Tesla academy» компаниялари Республикада етакчи компаниялардан бири бўлган «MohirDev» билан ҳамкорликни йўлга қўйган бўлиб, бу орқали АйТи бозорда талаб катта бўлган йўналишларда малакали мутахассисларни тайёрлайди. Курсларни битирган ўқувчилар, хорижий компанияларда буюртмалар олиб, амалий иш фаолиятини йўлга қўядилар. «Fluggi» компанияси айни пайтда халқаро ташкилотлар билан ҳамкорликда ишламоқда. Европа Иттифоқи грантларига сазовор бўлган корхоналарнинг рақамлаштириш ва АйТи ечимлари айнан шу компания томонидан амалга оширилмоқда. «EuroSoft» компанияси ҳозирда Германия, Чехия давлатларидаги 10 мингдан зиёд банкоматларни техник қўллаб-қувватламоқда. Бу соҳада ҳамкорлик Жануби-Шарқий Осиё давлатларида ҳам йўлга қўйилаётгани эътирофга сазовор. «Compass X» компаниясининг маҳсулотларни мижозгача етказиб бериш жараёнларини автоматлаштиришдаги камчиликларни олдини олувчи стартап-лойиҳаси АҚШ инвесторлари эътиборига тушди. Натижада америкаликлар лойиҳани молиялашни бошлашди. «Axioma Line», «Tech Data Soft» компаниялари эса Россия ва Болтиқбўйи давлатларининг тиббий даргоҳлари билан рақамлаштириш, дастурий маҳсулотлар билан бўйича ҳамкорликни йўлга қўйган.
Давлат раҳбари ва ҳукумат томонидан соҳага берилаёган эътибор, имтиёз ва преференциялар натижасида Республикада етакчи бўлган «Data Site», «Site Labs» компаниялари сафи юқоридаги каби истиқболли компаниялари билан тўлаётганини алоҳида эътироф этиш зарур. Сентябрь ойидаги IT-Park резидентлари сони 19 тани ташкил этган эди. Кўрилган чоралар натижасида уларнинг сони 24 тага етди. Ўтказилган учрашувлар натижасида 6 та норезидент АйТи компания IT-Park резидентлигини олиш учун буюртма расмийлаштирди. Тез кунларда бу кўрсаткич 30 тага етади.