Табиатда биофонни бойитиш ва зарарли организмлар кенг тарқалишини олдини олиш ҳамда уларга қарши биологик кураш ишларини ривожлантириш мақсадида республика бўйлаб 2023 йил 29 майдан 28 июнга қадар “Долзарб ўттиз кунлик биоҳимоя” тадбири эълон қилинди.
Агрокластерлар, фермер ва деҳқон хўжаликлари вакиллари ҳамда томорқа эгалари иштирокида “Биологик ҳимоянинг афзаллиги” мавзусида кўргазмали семинарларни ташкил этиш бу ойликнинг самарали ўтказилишини таъминлайди.
Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги тизимидаги “Биосифат” республика маркази ташаббуси билан ўтказилаётган ушбу кенг қамровли семинар тадбирларида ғўза майдонларига биолабораторияларда етиштирилган олтинкўз энтомофагларини гектарига 1000-2000 донадан тарқатилишини таъминлаш ҳамда кузги тунлам ва ғўза тунламларини аниқлаш мақсадида гектарига 1 донадан феромон тутқичларни ўрнатиш кўзда тутилган. Экин майдонида ушбу феромон тутқич ёрдамида ҳашарот ёки зараркунанда бор-йўқлигини, унинг миқдорини билиш мумкин.
Шу билан бирга, ушбу ойлик доирасида мевали боғ, полиз, иссиқхона, дуккакли ва бошқа экинларда учрайдиган зараркунандаларга қарши олтинкўз ва бракон энтомофагларининг гектарига 2000-3000 донадан 3 маротаба тарқатилишини таъминлаш ҳамда дала ва иссиқхоналарда етиштирилаётган помидор, бодринг, булғор қалампири ва цитрус экинларида учрайдиган зараркунандаларга қарши биологик курашда уларнинг зичлигига қараб, гектарига 3000-5000 донадан олтинкўз энтомофагларини тарқатиш ҳам режалаштирилган.
Ушбу ойликни ўтказиш орқали республикамиз экин майдонларидаги ҳар бир ўсимликни ҳимоя қилиш, унга зарар берувчи зараркунанда ҳамда касалликларга қарши курашишга эришиш мумкинлиги йиллар мобайнида ўз исботини топиб келмоқда.
Ойлик давом этмоқда ва унга боғлиқ тадбирларда фаол иштирок этамиз.
Шерзод Юсупов, Ўсимликлар карантини ва ҳимояси Чортоқ туманИ бўлими Фитосанитар назорати давлат инспектори