Ўзбекистон Республкаси Меҳнат кодексининг 404-моддасига кўра, аёлга туғруққача 70 календар кун ҳамда туғруқдан кейин 56 календар кун (туғиш қийин кечган ёхуд икки ёки ундан ортиқ бола туғилган тақдирда 70 календар кун) ҳомиладорлик ва туғиш таътили берилиб, қонунчиликда белгиланган, лекин ўртача ойлик иш ҳақининг 75 фоизидан кам бўлмаган миқдорда нафақа тўланади.
Ҳомиладорлик ва туғиш таътили аёлга жамланган ҳолда ҳисоблаб чиқарилиб, туғруққача ҳақиқатда фойдаланилган кунлар сонидан қатъи назар, тўлиқ берилади.
Ҳомиладорлик ва туғиш нафақасини тайинлаш ҳамда тўлаш тартиби Ўзбекистон Республикаси Вазирлар Маҳкамаси томонидан белгиланади.
Вазирлар Маҳкамасининг 2022-йил 20-центабрдаги 515-қарори билан тасдиқланган “Давлат ижтимоий суғуртаси бўйича ҳомиладорлик ва туғиш нафақасини тайинлаш ҳамда тўлаш тартиби тўғрисида”ги низом эса меҳнат шартномасига асосан охирги 6 ой давомида узлуксиз иш стажига эга бўлган аёлларга давлат ижтимоий суғуртаси бўйича ҳомиладорлик ва туғиш нафақасини тайинлаш ва тўлаш тартибини белгилайди.
Ҳомиладорлик ва туғиш бўйича меҳнатга лаёқатсизлик варақалари бериш тартибини эса “Меҳнатга лаёқатсизлик варақаларини бериш тартиби тўғрисида”ги йўриқнома тартибга солади.
“Меҳнатга лаёқатсизлик варақаларини бериш тартиби тўғрисида”ги йўриқноманинг 27-бандига кўра, ҳомиладорлик ва туғиш бўйича меҳнатга лаёқатсизлик варақаси ҳомиладорликнинг 30-ҳафтасидан бошлаб ҳудудий амбулатор-поликлиникаларнинг, акушер-гинеколог (умумий амалиёт шифокори) томонидан бош шифокор ўринбосари билан биргаликда бир йўла 126 календар кунига берилади ва давлат ижтимоий суғуртаси бўйича нафақа тўланади.
Туғиш қийин кечган ёки икки ва ундан ортиқ бола туғилган ҳолларда ҳомиладорлик ва туғиш таътилини узайтириш учун туғруқ муассасаси томонидан яна 14 календар кунига меҳнатга лаёқатсизлик варақаси берилади.
Чортоқ туман Адлия бўлими ЮХКМ
бош юристконсулти : И. Жаннатиллаев